تحدث يوسف أوباما، لاعب بيراميدز، عن أبرز محطات مشواره مع البطولات، وكواليس العمل داخل النادي، إلى جانب تجربته مع الكرواتي يورشيتش والجنوب أفريقي موكينا، ورؤيته للمنافسة مع الأهلي والزمالك في بطولة الدوري.

وقال أوباما في تصريحات تليفزيونية، إن البطولات التي حققها خلال مسيرته تحمل قيمة خاصة بالنسبة له، موضحًا أن البطولات التي تأتي في ظروف صعبة تكون ذات مذاق مختلف، وأضاف: «ربنا كرمني في حاجات كتير حلوة، وعلى المستوى الكروي البطولات، والأغلى هي البطولات اللي بتيجي في ظروف صعبة، ومعظم بطولات الزمالك كانت في ظروف صعبة، ولما تاخد البطولة والناس بتشكك فيك بيبقى طعمها حلو، وكل بطولات الزمالك حلوة».

وعن تتويجه مع بيراميدز بلقب دوري أبطال أفريقيا، قال: «بطولة دوري إبطال إفريقيا مع بيراميدز كانت رائعة بالنسبة لي لأنها كانت ناقصاني، وكانت مهمة أوي بالنسبة لي»، مشيرًا إلى أن أكثر لحظاته حزنًا كانت عدم مشاركته في نهائي القرن.

وأضاف: «اللحظة اللي زعلت فيها كانت إني ما شاركتش في نهائي القرن»، مؤكدًا أن ما تحقق في مسيرته يعود في النهاية إلى التوفيق من الله، قائلًا: «كل ده توفيق من عند الله، إحنا بنجتهد ونتعب وربنا بيوفقنا، والتوفيق معايا الحمد لله».

يوسف أوباما يتحدث عن موكينا ويورشيتش

وتطرق أوباما إلى علاقته بالجنوب أفريقي موكينا، مشيدًا بطريقة تعامله مع اللاعبين، وقال: «موكينا حبني وبيحب أي حد بيلعب كورة، وهو عنده الناس اللي عندها لمسة، وبيتعامل معانا كأنه أخ كبير لينا، وكل واحد بيبقى عايز يطلع اللي جواه عشانه، والحمد لله بنظهر بصورة كويسة».

وعن المقارنة بين موكينا والكرواتي يورشيتش، أوضح لاعب بيراميدز: «موكينا ويورشيتش مدرستين مختلفتين تمامًا، والاتنين كويسين بالنسبة لبيراميدز، بس ده حاجة وده حاجة».

وتحدث أوباما عن تجربته مع يورشيتش، قائلًا: «في الأول اتكلمت معاه، وفي السنة الأولى كنت بشارك قليل، بس ده طبيعي، وكنت بنزل وبجيب جول، فاتكلمت معاه بعد لما حسيت إني في مستوايا وكنت موفق، وكنت بلعب مباراة وأغيب 5، وأنا بشخصيتي مش بحب أتكلم مع مدربين عن حاجة زي كده».

وأضاف أن يورشيتش لم يقدم له أسبابًا مقنعة بشأن عدم منحه أدوارًا أكبر خلال فترة وجوده مع الفريق.

أوباما: إدارة بيراميدز تعمل وفق نظام رائع

وأشاد يوسف أوباما بطريقة العمل داخل نادي بيراميدز، مؤكدًا أن التطور الذي شهده النادي منذ انضمامه لم يكن وليد الصدفة، وقال: «بما يرضي الله من ساعة ما رحت النادي، والإدارة عاملة سيستم رائع، والبطولات مش بتتحقق من يوم وليلة، في تخطيط وتفاصيل كتير الناس بتتعب فيها».

وتابع: «وأنا بحييهم جدًا على ده لأنه بياخد مجهود كبير أوي، وخصوصًا إن مفيش دعم جماهيري، وإن شاء الله اللي جاي يكون أحسن».

وعن مشوار بيراميدز في الدوري، أعرب أوباما عن تفاؤله، مؤكدًا أن الحكم على المنافسة لا يزال مبكرًا بعد مرور أول 5 مباريات، وقال: «حاسين إن لسه بدري، أول 5 مباريات في الدوري ما تدلش على أي حاجة، لأن لسه بدري ولسه بنقول يا هادي، وإن شاء الله ربنا يوفقنا في مشوار الدوري».

يوسف أوباما عن المنافسة مع الأهلي والزمالك

وتحدث أوباما عن المنافسة مع الأهلي والزمالك، مشيرًا إلى قوة جماهير الناديين، وقال: «الجمهورين من أكبر الجمهورين في الشرق الأوسط وإفريقيا، ووجودهم عندما يكونوا منافسين بياخد منك غصب عنك».

وأضاف: «وبالنسبة لي جمهور الزمالك أصعب عندما يكون منافس، ومن وجهة نظري هو اللي جاب الدوري للفرقة السنة اللي فاتت، بيعملوا حالة غير طبيعية وما أعتقدش إني هشوفها».

وأوضح لاعب بيراميدز أن الأهلي والزمالك يمثلان منافسة قوية للفريق في الدوري، قائلًا: «الأهلي والزمالك الفرقتين مصدر خوف لنا في الدوري، بس إحنا برضو باسم نادي كبير وبطل إفريقيا، وبإذن الله واحد أحد ناخد الدوري».

واختتم أوباما حديثه بالتأكيد على رغبة لاعبي بيراميدز في تحقيق الفوز خلال جميع المباريات، بغض النظر عن المنافس، وقال: «طبيعي بينا وبين بعض في أوضة اللبس عايزين نكسب أي ماتش، ومرينا بماتشات صعبة جدًا زي صن داونز وأورلاندو، وبنتعامل على أساس إن إحنا نادي بطولات، فبنبقى عايزين نفوز في كل مباراة أيًا كان مين المنافس».